Amurrioko Tokiko Gobernu Batzarrak ekitaldi honi dagozkion azken ordainketak onartu ditu gaur egindako bilkuran. Guztira 200.000 euro esleitu dira, udalaren diru-sarreretan parte hartzeko prozesuari lotutako 2025eko laugarren hiruhilekoaren likidazioaren barruan.

Administrazio Batzarrek funtsezko eginkizuna betetzen dute gure kontzejuen eguneroko kudeaketan eta herritarrei ematen zaien hurbileko arretan. Udal aurrekontuko partidaren igoera honek haien lana aitortzea dakar, eta baliabide gehiagoz hornitzeko apustua da, beren jarduera eta eskaintzen dituzten zerbitzuak hobetzen jarrai dezaten. Udaletik Administrazio Batzarrekin lankidetza indartzen jarraitu nahi da, eta egungo zein etorkizuneko beharrei aurre egiteko baliabide nahikoak dituztela bermatu. Udal honek lanean jarraituko du udal diru-sarreren banaketan parte hartzea kontzeju guztientzat tresna erabilgarria, gardena eta bidezkoa izan dadin.

Kopuru horrek 20.000 euroko igoera dakar aurreko ekitaldiekin alderatuta, udalerriko landaguneak kudeatzen dituzten erakundeekiko udal-konpromisoa indartuz.

Administrazio Batzarren arteko banaketa «Amurrioko Udalaren diru-sarreretan duten partaidetza Amurrioko udalerriko Administrazio Batzarren artean banatzeko oinarrietan» xedatutakoaren arabera egin da. Oinarri horiek Aurrekontuak Betearazteko Udal Arauaren 31. oinarrian jasota daude. Araudi hori 2025eko martxoaren 13an egindako Osoko Bilkuran onartu zen, eta 2025eko apirilaren 16an argitaratu zen ALHAOn, prozesu gardena eta aurrez ezarritako irizpideen araberakoa bermatuz.

Diru-kopuru horrekin, Amurrioko Udalak berretsi egiten du Administrazio Batzarrek egiten duten lana babesten duela, eta funtsezko eginkizuna betetzen duela udalerriko kontzejuen kudeaketan eta dinamizazioan.